ois glana bua howe kan schbinod megn ned um de buag und do hod mei grosmuta amoi af da schdrosn wias mid mia schbazian gaunga is an wochmau trofn und hod eam leise wos gsogd und ea hod me schdreng augschaud fa om owe und hod gsod i hob ghead du isst dein schbinod ned zaum daun kumst owa ins schbekkamal a schbekkamal woa da gemeindekota de ausnüchdarungszöln fia de augflaschlndn und mei grosmuta de guakn woit gscheid sei und da wochmau dea drotl hod midgschbüd heit iss e gean an schbinod und obs an gemeindekota nau gibt was e ned de grosmuta is scho lengst gschduam owa de wochleid hassn oiweu nau schbinodwochta
Oamui nau a Lausbui sei, jung und unbeschwead, si nix scheißn meïssn um deïs, wos si sou ghead, af an freïmdn Ocka Pfoffadadscharln broucka, Föwapfeifarl schnitzn, und mit deï daunn Vougarln aunloucka, ban Moahoufdeich Muich und Kaulquappm faunga, iwan Zaun zan Nochban umi nouch zeidiche Äipfün glaunga, ban Krebsnboch hoamlich Feia hazn und frech voun da Schindabruck owischlatzn, Greïscharln und kloani Stoan afd Schienan leïgn, in da Schupfa vasteïcka und si nid beweïgn, am Viechmoark stundnlaung begarln mid oan Boin, ba-r-oan Stodl oan Heahndreïg schmiean afd Schnoin, houch oubm af oan Nussbam si a Hittn baun und bam Bieberle dreïnt reife Keaschdn klaun, mid n Groudnfeidl si a Zwuschl schnitzn, in Kodna-Bod spechtln duarch deï Breïdlritzn, afn Gstappmbeach stundnlaung »Vabanne dich« spün, af oan Logafeia an müchign Gugruzkuibm grün, in da Gluid daunn gstulani Bougarln brodn, deï Housn aufkreïmpün und ouhni Schuih in Boch umwodn, mid oan Madl hamlich in oan Gebüsch drein sitzn und eahm noucha-r-a Heazal in a Bamrindn ritzn, mid deï Buim voun da Nochbaruatschoft rafa und si zan Prouwiean in da Trafik Tschick kafa, deï Stroß mid oan Ziaglbroucka aunmoina und Tempühupfm, a Rollahatzal mocha oda oafoch nia Boin schupfm … – wia gsogd: oamui nau a Lausbui sei, deïs warad scheï, owa ih moan, deïs wiad leida neamma geïh!
Bei da Oma im Goatn hats ois gebn: Erbsen, Himbeern, Oadaxl, a Bankl wo ma si an Schiefer einzogn hat am Hintern. Zigeuneräpfl, weiße Kirschn, Sauraumpfer und Bockbart zum Knatschn, batzwoache Birn, Ribisel, Paradeiser. An Dackl, der in jeden Maulwurfshügl einigschnofelt hat, Brennessel, Wexn …. und mi.
Da pamarantschnbua bin i. Hinter meiner kugeln orangen, vorder meiner kuglst du. Schupfst hoit du die kloan, oft treib i die großn. Biawei, dianei, antnfeder. Pamarantschnhansei, nudeldicke mötz.
Rutsch i ban eis, luadahaö, rutscht du ban grabn. Mei orangenkopf weascht weiß und deiner rommig. Schneemokloaner zopfn, ascheikoite schwester. Biawei, dianei, antntuck.
Biawei, dianei, antndreck. Huck i an putzdunkln bagascht, huckst du aufn winteröpfibam. Du nochtfinstre drossel, sog dei pamarantschnbruader.
Kimn oa ban bam, kimm oa, oft sing ma wos zomm: a kloa sunnbergtotzn und ’s wüdgfliglate schottseitmötzei. Husige sänger firchtn si nit: husige kina. Biawei, mötzei, antndreck.
Huck auf, i bin da kohlrobnschwoschze puger und du de kloan reiterin. Biawei, dianei, antndreck: weit hinterm see. So kemma ma gor bis uggl oder towaschbach. Biawei, dianei, norikerflug.
»I bin a klans Binkerl und stöh mi ins Winkerl und weil i nix kann drum fang i nix an«
Wia suit i wos kenna wer tatat ma was nenna was kenntat i learna ?
I nimm ma an Poista und wutzl am Zipfl suitat i nix dalerna des war jo der Gipfl.
Muast neugierig sein genier di net sogt mei Oma wonnst nix fragst bleibst bled.
So hob i ma vurgnuma an graden Togn frag i die Muata sie hat owa nit sovü Geduld weils allaweil glaubt sie is schuld woun die Lehrer von mir glauben i bin dumm, daher frag i weida: Warum, warum?
An ungrodn Togn do frog i mei Schwester di is scho a bisserl länger auf der Wöd deshoib glaub dass woar is wos dazoit.
Also bleibt nur der Samstog um den Vota zum frogn der hat am allermeisten zum sogn. Er dazöit ma vom Weita und der Politik, manchesmoi kumm i gar net mit. Es is afoch schen zurzuhern do kann uns gor kanna stehrn.
Am Suntog geh i zur Oma und setz mi aufd Schoss sie druckt mi ganz fest und frogt: Wos is los?
I wü jo nur wissen host du mi gern a wenn i in der Schui garnit guat learn ?
Oma sogt dass sie jo a net ais was und gescheit is nur der der was wo er findet, wos er net was.
Kumm her mei klans Binkerl kraxl aussi ausn Winkerl host eh scho sofü glernt und bist gscheida worn mir san holt Alle nit gscheit geboren.
Und wenn a Gscheitheit hüft in dera Wöd is des längst ned olles was im Lebn zöd Mitn Herz am richtigen Fleck zierst du jeden Winkl mei ollerliabstes Herzibinkl
da glane maxl wü a baua wean ka webdiseina ka komunikazionskonsalta ka kiekaunt menetscha und ka juman resursis menetscha a baua weu de kia so liab san de keiwal und de farln und weu ma do imma draussd sei kau und weu de eadn so guad riachd mei iagendwia a bledsinn nadiale iagendwia wos wo ma se dengt nau jo owa iagendwia scho aa boedesch
i warat gern no amol gonz jung tat in de zeit zruckgehn und meine potza ausbessan wolln wonns ma im nochhinein einfollt i hätt se mea gernhobn solln i geh wia im tram no amol hin zua eam zan druckn und beguatn zan eaklärn und zeit lossn brems de gneat aus und hear bessa zua
wiaso hot da herrgott ka frau frogt mi mei enkale dea muss doch so allani sein wia holtat ea dos aus schau i hob mei mama mein papa meine gschwista und di wasst de menschn hobm eam de frau anfoch ausradiert sege manda hobn de göttin ibasegn vagessn gmocht sderf kane gebn allan herrschst sichs leichta wos de leit so olles glabn
voipockt mit sackaln und packaln tauchi bei de kinda auf eiglodn vun da schwiagatochta zu ana ostajausn mei sohn mocht ma de tir auf im vurzimma fliagi glei übara feangsteierts auto des kind is no net auftaucht des sitzt zwischn seine schpüsochn im wohnzimma aufm bodn east oisi de geschenke oblod kumt da bua aufd fiaß um z’griaßn vurm auspockn zerst de jausn mit gaukau kaffee und turtn in da kuchl des kind hupft aufn sessl dossma ongst und bong wiad greiftsi quer übern kuchltisch a schokotöatchen vum tölla und schtopft sis in mund ois wos net einepasst foit aufn tisch oda sessl oda bodn de serviettn liagt nua zum schpaß do iwoga bemeakung auf zrechtweisn foigta net maßregln mi de ötan do wiada oba in da schui schwierichkeitn kriagn außadem sitzi net gean in da pickatn möschpeis da bua geht schokovaschmiat vum tisch zruck zu seine schpüsochn da gonze fuaßbodn voi mit steckbauschtana und klane autos nachdemi mein gaukau austrunkn hob setzimi zum enkal aufn bodn in weisa vuraussicht hob i sogoa am festtag jeans on und hölf eam beim zsammraman donn oba stauni er hot si ausm aufklopptn mit küchnroininnerei obgschtütztn poppndeckldeckl vun ana schuachschochtl a schutzdoch fia de autos baut ausm untateuil a rompn ausgschnittn ois eifoat zua garasch fir de klanarn autos a praktische afoche idee schweast beeindruckt vun sovü geistiga regsomkeit und tatkroft bleibtma nix ondars übrich ois dem frotzn oda eigentli dena ötern de monglndn maniern nochzusehn gessn homma zsamgramt a und gnua bewundat jetzt wiad auspockt damit da klane wüdfong net unruig wiad
I bin ois junga Bui scha gwéin, a echta gluana Lump. Zigreddn g’racht, die Kotz seggiat, Bier drunga scha, auf pump. Die Pfoat héing va da Housn ausa, d´Schuich valian die Souhln, und gstod in d´Schui géihn, wia sís ghead, auf d’ Wiesn umatoulln. Wos is nit ois, säud oll déi Joa, auf insra Wöd bossiad? Sou hod déi Zäut, wea häd si ’ s dochd, van gluan uan großn Lumpm gmocht.
Er ischt scho durch viel Händ ganga. Händ vo Gschäftslüt und Husfraua, Studeanta und Bura und Handwerker. Zletscht ischt er ama Landstricher us sim löchriga Hosasack gfalla und is Gräs grollt. A Kind heata gfunda. A Kind heat d’ Oga nöher am Boda. Und wenigr großspurige Gedanka im Kopf. Drum siacht’s, wenn ebbas am Weagrand glänzt. »Bloß a Stückle Bleach! Obacht, du künnscht dir wehtoa«, rüaft da Papa, aber ’s Kind rennt glei druf zua, bückt si danoch und freut sie über sin Fund. »Aso, an Euro«, set da Papa, »en muaß ebmer verlora ha.« »Kann i ean bhalta?«, frogt ’s Kind. Es ischt scho so wit domeschtiziert, dass es da Unterschied zwüschat Mi und Di verinnerlicht heat, und des Kapitalismusgsetz – höher, witer, meh und wer am meischta heat, heat gewunna – würd eam bald amol bibrocht. Abr noch ischt so an Euro oafach schöa. Höfali kratzt’s da Dreack weag, blost da Stob furt und lota i dr Sunna ufblitza. »Iatz hör uf und kumm endlich«, set da Papa. Dr Euro verschwindet i dr Kinderfuscht. Dahoam kriagt er an Ehraplatz ufm Nachtkästle, würd jeda Tag poliert, gstreichlat und umazoagt. Bis d’Mama s’Kinderzimmer ufrumt. Sie steckt da Euro durch an Schlitz ina dunkle Böchs. Döt trifft er uf Kollega, Euro, Cent, Groscha, Schilling und soger a paar Rappa und Fränkli. Mit dr Zit sind immer meh dazuako, es ischt eng wora wia imana Sarg, dr Euro heat Angscht ka, dass er nia meh us deam Massagrab usakunnt. Abr es ischt anders ko. Viel spöter heats uf oamol an furchtbara Schlag toa, Böchs ischt explodiert und d’Münza sind in alle Himmelsrichtiga usanandergspickt. Dr Euro ischt is Rolla ko, über a Kanta ahigstüarzt, witergrollt und im Schatta vomana Bom im Gräs legableba. Sither wartat er druf, dass ean a Kind findat und i dr Sunna ufblitza lot.
Deaf i moi eini schau? Na, so griaweg! Und so vü Hoa! A so a liabs Biaschal. Aso! A Diandl is! Na, wia d’Mama. Und? Is er eh brav? Jojo feigets na a weng, d’Mama. Soid scho aufsteh. Haha! Muats babbat is er, ha? Der werd se scho nu zaum wochsn. Na Hauptsoch, se san gsund, geee?
A Wochn nau Schui, die Zeignis san gschriem, die Lehra gengan mit Kinda ins Bod. Daun sitzns aufn Bangl und schaun, wos si duat. Die Madln stengan bei da Dusch und schaun umme zu d’ Buam. De hupfm und springan und schrein wia bled, ois obs ana mit an Messa ogstochn häd. Do kummt da blade Bua, und plötzlich is stü, und daun schnappms eahm zu fünft und zahn und zahn, und da blade Bua losst sie foin. Die Buam, de roin eahm zum Wossa hin, a Stessa no, und scho is er drin. Do taucht er umme zu da Stiagn, er kräut auffe und wischt si die Hoa aus da Stian. Er nimmt an Auraund und springt so hoch und so weit er nur kaun, a richtig schene Oaschbombm mocht er daun. Und jetzt is er da King, wäu kana kaun so spritzn wia ea. Supa Peda, heat ma jetzt die Madln schrein, und die Buam, de hupfm und boschn ind Händ. Die Lehra aum Bangl, de schaun si zfriedn au, wia si maunchsmoi ois vo söba regln kau.
marandjosef is des a schwoazes murggale sogn de leit zur klanen gitschn so a schwoarzes murggale se schaugn zum vota es is earm wia ausm gsicht gschnittn de muatta was nit recht wia se des kindle dos se aus ihr außazogn hobn gernhobn soll ob se sich richtig gfrein derf hot se nit imma ghert nua de blondn de blauäuglatn san de gonz richtign poppalan oba ban nextn kind is e ois ondas des biable hot strohblonde hoar und himmelblaue äugalan
